ROMA/TIRANË — Ka përfunduar pas katër vitesh arratia e 42-vjeçarit shqiptar, i cili fshihej në zonat malore në lindje të vendit, pasi ishte dënuar me vendim të prerë për një sërë vjedhjesh në Itali.

Pas ekstradimit përmes linjës ajrore Rinas–Fiumicino, i dënuari është transferuar në burgun e Viterbos. Ai duhet të vuajë dënimin prej 5 vitesh, 9 muajsh e 5 ditë burg, si dhe të paguajë një gjobë prej 1.640 eurosh.

Kërkimet ndërkombëtare kishin nisur në vitin 2022, kur Prokuroria e Pordenones lëshoi një urdhër për bashkimin e dënimeve për krime të kryera në periudhën 2013–2016. Sipas dosjes hetimore, 42-vjeçari kishte kryer vjedhje në shtëpi pushimi dhe dhoma hotelesh në zonat turistike të Lignano Sabbiadoro, Caorle dhe në Romë.

Një nga sfidat kryesore të autoriteteve ishte identifikimi i tij, pasi ai kishte përdorur sistematikisht shtatë pseudonime dhe dokumente të falsifikuara, përfshirë një kartë identiteti rumune.

Ai u lokalizua dhe u ndalua më 11 mars në portin e Durrësit nën identitetin e Armando Valchizan (së bashku me emra të tjerë si Armando Dervishi, Altin Dervishi etj.). Ekstradimi i tij u finalizua falë bashkëpunimit të ngushtë mes forcave të rendit të dy vendeve dhe koordinimit të zyrave të Interpol Romës dhe Interpol Tiranës.