TIRANË – Një mesazh simbolik ka tërhequr vëmendjen gjatë protestës së mbrëmjes së të premtes para Kryeministrisë, ku mijëra pjesëmarrës janë mbledhur në Bulevardin “Dëshmorët e Kombit”.

Pamjet ajrore të siguruara gjatë protestës tregojnë një mbishkrim të madh të vendosur në asfalt, pranë një flamuri kombëtar kuq e zi. Me shkronja të mëdha të bardha është shkruar mesazhi: “JEMI NJË!”

Mbishkrimi është vendosur në një nga hapësirat qendrore të bulevardit, i rrethuar nga protestuesit që kanë marrë pjesë në tubim.

Mesazhi është interpretuar nga organizatorët dhe pjesëmarrësit si një simbol i bashkimit mes shqiptarëve brenda vendit dhe atyre që jetojnë jashtë Shqipërisë.

Protesta e 14 gushtit është shoqëruar me një pjesëmarrje të konsiderueshme të diasporës, me qytetarë që kanë ardhur nga vende të ndryshme për t’iu bashkuar tubimit në Tiranë.

Prania e flamurit kombëtar dhe mesazhi “JEMI NJË!” kanë qenë ndër elementët më të dallueshëm të protestës, duke i dhënë tubimit edhe një dimension simbolik përtej kërkesave politike të protestuesve.

Protesta vijon përpara Kryeministrisë, ndërsa pamjet nga lart kanë dokumentuar përmasat e tubimit dhe mesazhin e vendosur në bulevard.