PËRMET – Për më shumë se dy vjet, një dhomë spitali është kthyer në strehën e vetme për Durim Elmazin, një burrë nga Përmeti, i cili pas amputimit të njërës këmbë dhe përkeqësimit të gjendjes sociale nuk ka pasur ku të jetojë.

Elmazi ndodhet në Spitalin e Përmetit që prej 27 majit 2024. Sipas Ministrisë së Shëndetësisë, ai u paraqit në strukturën shëndetësore pas një ndërhyrjeje kirurgjikale dhe, për shkak të situatës së vështirë sociale dhe familjare, qëndroi aty edhe pas përfundimit të trajtimit.

Historia e tij lidhet me një sërë problemesh shëndetësore. Elmazi, me origjinë nga fshati Mokricë, ka vuajtur nga diabeti dhe gangrena, gjendje që çoi në amputimin e njërës këmbë. Pas divorcit, ai kishte jetuar për vite në Greqi, ndërsa në fund të vitit 2023 të afërmit e kthyen në Shqipëri për trajtim mjekësor.

Pas qëndrimeve në spitalet e Përmetit dhe Gjirokastrës, ai përfundoi sërish në Spitalin e Përmetit. Sipas rrëfimit të tij për Report TV, familja e tij ndodhet në Greqi dhe ai nuk ka një banesë ku të kthehet.

“Unë s’vete në shtëpi se s’kam njeri në shtëpi. S’kam as shpi as njeri. Me nusen u ndava. Kam 2 fëmijë, i kam të martuar në Greqi. E dinë që ndodhem këtu në spital.”

Pavarësisht se nuk ka më nevojë për trajtim spitalor të vazhdueshëm, Elmazi vijon të qëndrojë në spital, pasi nuk ka një alternativë tjetër strehimi.

Kryeinfermierja e Spitalit të Përmetit, Antoneta Gaqo, tha se gjatë gjithë kësaj periudhe atij nuk i ka munguar kujdesi shëndetësor dhe asistenca bazë.

“Durimi ka 2 vjet e gjysmë që ka ardhur këtu. Ka pasur probleme me këmbën. Familjarët e kanë lënë tek dera e spitalit. Është shtruar në pavion, është trajtuar dhe më pas ka ngelur se nuk e merrte asnjeri.”

Çfarë thotë Ministria e Shëndetësisë

Ministria e Shëndetësisë konfirmon se Elmazi është në kujdesin e strukturave shëndetësore prej 27 majit 2024 dhe se gjatë kësaj kohe i është ofruar trajtim mjekësor, kujdes infermieror, asistencë për higjienën personale dhe mbështetje për lëvizjen.

Sipas ministrisë, paralelisht janë angazhuar edhe strukturat sociale vendore dhe rajonale për gjetjen e një zgjidhjeje afatgjatë.

Në bashkëpunim me Bashkinë Përmet, autoritetet kanë siguruar ndihmë ekonomike dhe mbështetje ushqimore, ndërsa është ndërmarrë edhe procedura për përfitimin e pensionit.

Më 11 gusht 2026 është kryer aplikimi për lidhjen e pensionit të Elmazit.

Rasti i tij nxjerr në pah vështirësinë e trajtimit të rasteve ku problemet shëndetësore ndërthuren me mungesën e strehimit dhe mbështetjes familjare. Për Elmazin, spitali ka mbetur për më shumë se dy vjet jo vetëm vendi ku mori trajtim, por edhe e vetmja strehë ku mund të qëndrojë.

Zgjidhja afatgjatë e rastit mbetet e lidhur me bashkëpunimin mes shërbimeve shëndetësore, strukturave sociale dhe pushtetit vendor për gjetjen e një strehimi dhe kujdesi të përshtatshëm jashtë mjedisit spitalor.