TIRANË – Qindra protestues janë mbledhur mbrëmjen e së premtes në Bulevardin “Dëshmorët e Kombit”, në kuadër të protestës së 76-të kundër qeverisë dhe kryeministrit Edi Rama.

Tubimit i janë bashkuar edhe shqiptarë të ardhur nga diaspora, të cilët kanë udhëtuar nga vende të ndryshme ku jetojnë për të marrë pjesë në protestë.

Pamjet nga terreni tregojnë një pjesëmarrje të gjerë përgjatë bulevardit, ndërsa flamujt kuqezi dhe pankartat e protestuesve kanë dominuar hapësirën përballë Kryeministrisë.

Protestuesit kërkojnë dorëheqjen e kryeministrit Edi Rama dhe ndryshimin e klasës politike. Organizatorët dhe pjesëmarrësit e konsiderojnë tubimin e sotëm si një nga protestat më të mëdha të zhvilluara në Tiranë gjatë muajit gusht.

Protesta vijon pas 76 ditësh tubimesh të njëpasnjëshme, ndërsa pjesëmarrësit kanë deklaruar se do të vazhdojnë të kërkojnë ndryshime politike.

Prania e diasporës ka qenë një nga elementët kryesorë të protestës së kësaj të premteje, duke shtuar numrin e pjesëmarrësve në tubimin përpara Kryeministrisë.

Protesta vijon në Bulevardin “Dëshmorët e Kombit”, ndërsa nuk raportohet deri tani për incidente të rëndësishme.