TIRANË – Situata e zjarreve në zonën e Priskës së Madhe, në Tiranë, është përkeqësuar gjatë mbrëmjes së së premtes, ndërsa një vatër zjarri vijon të jetë aktive.

Era e fortë po favorizon përhapjen e flakëve në sipërfaqet e gjelbëruara, duke e bërë më të vështirë izolimin e vatrës. Tymi është përhapur në zonat përreth, ndërsa situata po monitorohet nga strukturat përgjegjëse.

Pamjet nga terreni tregojnë flakët që kanë përfshirë një sipërfaqe të konsiderueshme me bimësi. Kushtet atmosferike mbeten një faktor i rëndësishëm në ecurinë e situatës, pasi ndryshimi i shpejtësisë dhe drejtimit të erës mund të ndikojë në përhapjen e zjarrit.

Forcat që po punojnë në terren vijojnë ndërhyrjen me synim izolimin e vatrës dhe parandalimin e përhapjes së flakëve në zona të tjera.

Deri në këto momente nuk raportohet për persona të lënduar apo dëme të konfirmuara në banesa nga kjo vatër zjarri.

Autoritetet vijojnë monitorimin e situatës, ndërsa pritet që kushtet atmosferike dhe intensiteti i erës të mbeten faktorë përcaktues për ecurinë e zjarrit gjatë orëve në vijim.