TIRANË – “Diaspora është këtu” dhe “Edi Rama jep dorëheqjen” janë ndër thirrjet që po shoqërojnë protestën e kësaj të premteje në Tiranë, ndërsa qytetarët vijojnë marshimin në drejtim të Kryeministrisë.

Tubimit i janë bashkuar edhe të rinj shqiptarë të ardhur nga diaspora, të cilët janë grumbulluar fillimisht në zonën e ish-Stacionit të Trenit. Prej aty, protestuesit kanë nisur marshimin drejt Sheshit “Skënderbej” dhe më pas në drejtim të Kryeministrisë.

Protesta e sotme është e 76-ta radhazi, sipas organizatorëve, ndërsa pjesëmarrësit kërkojnë largimin e kryeministrit Edi Rama dhe ndryshimin e klasës politike.

Gjatë marshimit janë dëgjuar thirrje kundër qeverisë dhe kryeministrit, ndërsa protestuesit kanë mbajtur pankarta dhe kanë përcjellë mesazhe kundër korrupsionit dhe politikës aktuale.

Ndër sloganet e përsëritura gjatë tubimit është edhe “Rama në burg, Berisha në burg”, ndërsa pjesëmarrja e diasporës i ka dhënë një tjetër dimension protestës së kësaj mbrëmjeje.

Protestuesit vijojnë të marshojnë drejt Kryeministrisë, ndërsa pritet që tubimi të vijojë në orët në vazhdim.