Geron Cecja, 48 vjeç, i shpallur në kërkim ndërkombëtar nga autoritetet shqiptare për një vrasje të ndodhur në Tiranë në vitin 2006, është arrestuar në Athinë.

Arrestimi i tij është kryer nga një task-forcë speciale e Policisë Greke, pas informacionit të siguruar mbi vendndodhjen e 48-vjeçarit.

Sipas raportimeve të korrespondentit të Top Channel, Artur Bibe, Cecja u arrestua mesditën e 13 gushtit në zonën e Filotheit, në Athinë, nga efektivë të Departamentit të Kërkimit të Policisë Greke.

Cecja, i datëlindjes 27 nëntor 1978, akuzohet nga autoritetet shqiptare për vrasjen e një bashkëatdhetari në Tiranë, ngjarje e regjistruar në vitin 2006.

Për 48-vjeçarin ishte lëshuar një urdhër-arresti ndërkombëtar dhe ai ka qenë në kërkim nga autoritetet shqiptare prej rreth dy dekadash.

Pas arrestimit, Cecja është dërguar në Prokurorinë Publike kompetente në Greqi, ndërsa tashmë pritet vendimmarrja e autoriteteve greke për procedurat që lidhen me ekstradimin e tij drejt Shqipërisë.

48-vjeçari konsiderohet i dyshuar dhe jo fajtor deri në një vendim përfundimtar të gjykatës.