RROGOZHINË – Presidenti i klubit të Egnatias, Agim Demrozi, ka shpërblyer skuadrën me një premio prej 200 mijë eurosh pas suksesit historik në kompeticionet europiane. Shpërblimi vjen pas kualifikimit të rrogozhinasve në play-off-in e UEFA Europa League dhe sigurimit të fazës së ligës në UEFA Conference League.

Egnatia realizoi një përmbysje spektakolare ndaj Shamrock Rovers, duke fshirë humbjen 3-1 të ndeshjes së parë me një triumf të thellë 5-1 në sfidën e kthimit. Duke mbajtur premtimin e dhënë më herët për arritjen e objektivave, presidenti Demrozi ka ndarë premien e majme për lojtarët dhe stafin teknik.

Pas këtij suksesi, skuadra shqiptare do të fokusohet te sfida e radhës në play-off-in e Europa League, ku do të përballet me ekipin norvegjez të Lillestrøm.