PRISHTINË – Hetuesit amerikanë kanë publikuar raportin paraprak mbi incidentin e rëndë të 10 korrikut në fluturimin e kompanisë Ryanair nga Selaniku drejt Memmingenit, ku një pasagjer 61-vjeçar serb, Ljubisa Karoviq, u plagos rëndë pasi u tërhoq pjesërisht jashtë dritares së avionit.

Sipas raportit të Bordit Kombëtar të Sigurisë së Transportit (NTSB), shkak i ngjarjes u bë shkëputja e një flete të ventilatorit të motorit të djathtë pak pas ngritjes. Pjesët e shkëputura goditën dhe thyen xhamin e kabinës, ndërsa presioni dhe vrima e krijuar bënë që Karoviq, i ulur pranë dritares, të tërhiqej jashtë me kokën dhe shpatullën e djathtë.

Bashkëshortja e tij, Svetlana Grkoviq Maksimoviq, ka treguar se paniku u vu nën kontroll falë ndihmës së udhëtarëve të tjerë dhe një pasagjeri që dyshohet se ishte shqiptar. Sipas saj, ai u përpoq fillimisht me një çantë dhe më pas me një valixhe për të bllokuar vrimën dhe për të ndihmuar në tërheqjen e pasagjerit brenda, duke i shpëtuar jetën.

Pilotët shpallën menjëherë emergjencën pas një shpërthimi të fortë dhe dridhjeve të vazhdueshme, duke u kthyer për t’u ulur në mënyrë të sigurt në aeroportin e Selanikut. Raporti tregon gjithashtu se motori ishte kontrolluar me ultratinguj në muajin maj, por nuk ishte konstatuar asnjë defekt.