Shqipëria ka mirëpritur zyrtarisht nënshkrimin e Marrëveshjes për Sigurimet Shoqërore me Poloninë, e cila është dekretuar nga presidenti polak, Karol Nawrocki.

Ministria për Evropën dhe Punët e Jashtme (MEPJ) e ka cilësuar këtë si një zhvillim tejet të rëndësishëm, pasi u garanton shtetasve shqiptarë që jetojnë dhe punojnë në Poloni njohjen e periudhave të punës, si dhe të drejtën e përfitimit dhe transferimit të kontributeve të tyre shoqërore.

Kjo marrëveshje i shtohet listës së akteve të ngjashme që Shqipëria ka lidhur ndër vite me shtete të tjera, si Italia, Gjermania, Austria, Belgjika, Franca, Zvicra, Hungaria, Kanadaja e të tjera, duke zgjeruar rrjetin e mbrojtjes dhe të drejtave sociale për diasporën dhe qytetarët shqiptarë jashtë vendit.