Të dhënat po ngarkohen...
Transmetuar më 14-08-2026, 10:58
Policia thotë se 19-vjeçari u kap pikërisht në momentin kur po i dorëzonte një çantë 26-vjeçarit. Kontrolli që pasoi çoi në sekuestrimin e një sasie tjetër dhe të një “BMW”-je
Policia e Tiranës ka finalizuar operacionin antidrogë të koduar “Momenti”, duke arrestuar në flagrancë dy persona të dyshuar për përfshirje në shitblerjen e kokainës.
Në pranga janë vënë D. Sh., 19 vjeç, dhe D. F., 26 vjeç, të cilët u kapën në rrugën “Egnantia”.
Sipas Policisë, specialistët e Seksionit për Hetimin e Narkotikëve kishin siguruar informacion në rrugë operative për përfshirjen e dy të rinjve në veprimtari të dyshuar kriminale në fushën e narkotikëve dhe organizuan ndërhyrjen.
19-vjeçari u kap në flagrancë teksa, sipas autoriteteve, po i dorëzonte 26-vjeçarit një çantë brenda së cilës ndodheshin 211 gramë lëndë e dyshuar narkotike kokainë.
Hetimet vijuan edhe me kontrollin e banesës së 19-vjeçarit, ku Policia njofton se gjeti dhe sekuestroi edhe 41 gramë të tjerë lëndë të dyshuar kokainë.
Në total, gjatë operacionit u sekuestruan 252 gramë kokainë, një automjet tip “BMW” dhe tre aparate celularë.
Materialet procedurale i janë referuar Prokurorisë për veprime të mëtejshme.
Shënim: Çdo person që mund të përmendet në përmbajtjen e këtij artikulli, mbështetur mbi parimin procedural penal dhe atë universal të prezumimit të pafajësisë, konsiderohet i pafajshëm penalisht, nëse nuk ka ose deri kur të ketë një vendim të formës së prerë.
Shënim: Në disa lajme, imazhet gjenden nga interneti, që konsiderohen të jenë në domenin publik. Nëse dikush pretendon pronësinë, ne do të citojmë autorin, ose, sipas kërkesës, do të heqim menjëherë imazhin.
Bashkohu me kanalin e NOA WhatsApp për lajmet më të fundit direkt në celularin tënd