TIRANË – Shqipëria do të vijojë të ndikohet edhe sot nga kushte atmosferike të paqëndrueshme, me vranësira dhe reshje shiu në disa zona të territorit.

Sipas Shërbimit Meteorologjik Ushtarak, moti do të jetë kryesisht i kthjellët, por me vranësira mesatare, të cilat herë pas here do të dendësohen përgjatë relieveve malore në jug dhe juglindje, kryesisht gjatë mesditës dhe pasdites.

Reshje shiu me intensitet të ulët priten në pjesën më të madhe të vendit. Ndërkohë, përgjatë zonave malore në lindje dhe juglindje mund të shfaqen shtrëngata afatshkurtra, të shoqëruara me shkarkesa elektrike, veçanërisht në orët e mesditës dhe pasdites së vonë.

Era do të fryjë nga veriperëndimi në verilindje me shpejtësi mesatare rreth 7 m/s. Përgjatë vijës bregdetare veriperëndimore dhe në zonat luginore, shpejtësia e erës mund të arrijë deri në 16 m/s.

Në det pritet valëzim i forcës 1–3 ballë.

Autoritetet meteorologjike këshillojnë kujdes të shtuar në zonat ku priten shtrëngata dhe erëra më të forta.