Egnatia ka mësuar kundërshtarin e saj në raundin “play-off” të Ligës së Europës, ku kampionët e Shqipërisë do të përballen me skuadrën norvegjeze Lillestrøm.

Shorti i UEFA-s kishte përcaktuar çiftin Shamrock Rovers/Egnatia – Lillestrøm, ndërsa pas kualifikimit të rrogozhinasve ndaj Shamrock Rovers, Egnatia tashmë do të përballet me norvegjezët për një vend në fazën e ligës së Ligës së Europës.

Ndeshja e parë do të zhvillohet më 20 gusht, me Egnatian që do të luajë në shtëpi, ndërsa sfida e kthimit do të zhvillohet më 27 gusht në transfertë.

Lillestrøm është një nga surprizat e këtij edicioni. Skuadra norvegjeze siguroi pjesëmarrjen në këtë fazë pasi fitoi Kupën e Norvegjisë, pavarësisht se në sezonin e kaluar militonte në kategorinë e dytë.

Për Egnatian, përballja me Lillestrøm është një tjetër mundësi për të shkruar historinë në arenën europiane. Rrogozhinasit kanë të garantuar të paktën pjesëmarrjen në fazën e ligës së Ligës së Konferencës, pavarësisht rezultatit në “play-off”-in e Ligës së Europës.