Dinamo ka bërë një paraqitje të jashtëzakonshme në ndeshjen e kthimit ndaj Audës, duke fituar me rezultatin e thellë 4-0 dhe duke përmbysur humbjen 1-0 të regjistruar në takimin e parë në Letoni.

Skuadra e drejtuar nga Ilir Daja e zhbllokoi sfidën në minutën e 36-të, kur Qardaku realizoi me një goditje të bukur nga hyrja e zonës.

Vetëm pak çaste para përfundimit të pjesës së parë, Qefalia dyfishoi avantazhin me një goditje spektakolare, duke e dërguar Dinamon në dhomat e zhveshjes me epërsinë 2-0.

Kryeqytetasit nuk u ndalën as në pjesën e dytë. Në minutën e 52-të, Malomo shënoi golin e tretë pas një kundërsulmi të shpejtë, duke e vendosur Dinamon në një pozicion shumë të favorshëm për kualifikimin.

Rezultati u vulos në minutën e 78-të nga Fadairo, i cili shënoi golin e katërt dhe i dha fund përfundimisht shpresave të skuadrës letoneze.

Dinamo e mbylli takimin me një fitore bindëse 4-0, duke përmbysur rezultatin e ndeshjes së parë dhe duke siguruar kalimin në fazën e play-off-it të Ligës së Konferencës.