Policia Kufitare dhe Njësia Policore Detare kanë intensifikuar kontrollet dhe patrullimet përgjatë vijës bregdetare të Ksamilit, me qëllim garantimin e sigurisë së pushuesve dhe respektimin e rregullave të lundrimit.

Gjatë një patrullimi në sektorin detar të Ksamilit, në zonën e njohur si “Tre Ishujt”, shërbimet e Policisë Kufitare kanë konstatuar një mjet lundrues tip Jet Ski që kishte hyrë brenda perimetrit të sigurisë, në hapësirën ku po laheshin pushuesit.

Sipas Policisë, hyrja e mjetit në këtë zonë ka rrezikuar jetën dhe sigurinë e personave që ndodheshin në det.

Pas përfundimit të procedurave administrative, mjeti lundrues është bllokuar, ndërsa pronari i tij, shtetasi A. P., është ndëshkuar me një masë administrative prej 500 mijë lekësh të rinj.

Policia e Shtetit u ka bërë thirrje përdoruesve të mjeteve lundruese dhe subjekteve që operojnë me to të respektojnë perimetrat e sigurisë dhe rregullat e lundrimit, duke shmangur hyrjen në zonat e përcaktuara për pushuesit.

Autoritetet paralajmërojnë se kontrollet dhe patrullimet përgjatë vijës bregdetare do të vijojnë për të parandaluar shkeljet dhe për të garantuar sigurinë e pushuesve gjatë sezonit turistik.