LDK tërhiqet nga çdo kërkesë për poste institucionale. Lumir Abdixhiku thotë se partia nuk kërkon më as ministri, as kreun e Kuvendit dhe as Presidencën

PRISHTINË – Kryetari i Lidhjes Demokratike të Kosovës, Lumir Abdixhiku, ka njoftuar se partia e tij tërhiqet nga çdo kërkesë për poste në institucionet e vendit, përfshirë pjesëmarrjen në qeveri, drejtimin e Kuvendit dhe postin e presidentit.

Deklarata u bë pas mbledhjes së Grupit Parlamentar të Lidhjes Demokratike të Kosovës, në një kohë kur vazhdojnë përpjekjet për gjetjen e një zgjidhjeje për situatën politike.

Abdixhiku tha se kërkesa e mëparshme e Lidhjes Demokratike të Kosovës për postin e presidentit kishte synuar krijimin e një ekuilibri institucional.

Ai bëri të ditur se Lëvizja Vetëvendosje i kishte propozuar partisë së tij pjesëmarrje në qeveri me tri ministri dhe postin e zëvendëskryeministrit, një ofertë të cilën LDK-ja e kishte refuzuar.

“Vetëvendosje kërkonte prani dekorative të LDK-së në qeveri, ku LDK-së i janë propozuar vetëm tri ministri dhe zëvendëskryeministri. Ne refuzuam një nënshtrim të tillë”, deklaroi Abdixhiku.

Sipas tij, pas refuzimit të kësaj oferte, Lëvizja Vetëvendosje nisi atë që ai e cilësoi si një përballje publike ndaj LDK-së.

Abdixhiku tha se partia e tij ka vendosur tashmë të heqë dorë nga çdo pretendim për poste, me argumentin se dëshiron të heqë çdo pengesë apo justifikim që mund të përdoret për vazhdimin e krizës politike.

“Për ta çliruar procesin nga çdo alibi dhe për t’i hapur rrugë zgjidhjes në interes shtetëror, LDK-ja tërhiqet nga çdo kërkesë për pozita dhe merr përsipër të kontribuojë pa asnjë përfitim politik në shmangien e krizës aktuale”, tha ai.

Kreu i LDK-së theksoi se partia nuk kërkon më asnjë ministri në një qeveri të mundshme.

“LDK-ja heq dorë nga çdo kërkesë për pjesëmarrje në qeveri. S’e duam asnjë ministri, le t’i mbajë të gjitha VV-ja”, deklaroi Abdixhiku.

Ai shtoi se LDK-ja tërhiqet gjithashtu nga kërkesa për postin e kryetarit të Kuvendit dhe nga pretendimi për të udhëhequr Presidencën.

“Heqim dorë nga kërkesa për kryetar të Kuvendit dhe, më e rëndësishmja, edhe nga kërkesa për ta udhëhequr postin e presidentit”, tha Abdixhiku.