Tregu shqiptar i automjeteve po shfaq një prirje gjithnjë e më të fortë drejt mjeteve me origjinë aziatike. Të dhënat e Drejtorisë së Përgjithshme të Shërbimeve të Transportit Rrugor (DPSHTRR) tregojnë se gjatë shtatë muajve të parë të vitit 2026 janë regjistruar për herë të parë 58.444 mjete, me një rritje prej 1,7% krahasuar me të njëjtën periudhë të vitit të kaluar.

Autoveturat vijojnë të dominojnë regjistrimet e reja. Nga totali i mjeteve të regjistruara për herë të parë, 46.446 janë autovetura, duke përbërë 79,5% të totalit për periudhën janar–korrik.

Koreja e Jugut dhe Kina në krye

Sipas statistikave të DPSHTRR-së, një pjesë e konsiderueshme e automjeteve të regjistruara për herë të parë në Shqipëri gjatë kësaj periudhe kanë origjinë aziatike.

Republika e Koresë renditet në vendin e parë për nga pesha në totalin e mjeteve të regjistruara, me 25,5%, ndërsa Kina zë vendin e dytë, me 16,2%.

Të marra së bashku, këto dy tregje përfaqësojnë 41,7% të të gjitha mjeteve të regjistruara për herë të parë gjatë shtatë muajve të parë të vitit.

Gjermania dhe Italia mbeten tregje të rëndësishme

Pas Koresë së Jugut dhe Kinës, në listën e vendeve të origjinës renditen disa prej tregjeve tradicionale europiane dhe amerikane.

Gjermania përbën 11,9% të totalit të mjeteve të regjistruara, ndërsa Italia 11,7%. Pavarësisht rritjes së peshës së mjeteve aziatike, të dyja vendet vijojnë të mbeten ndër burimet kryesore të automjeteve në tregun shqiptar.

Ndërkohë, Shtetet e Bashkuara të Amerikës përfaqësojnë 8,3% të totalit, ndërsa Zvicra 6,8%.

Shifrat e shtatë muajve të parë të vitit pasqyrojnë kështu një ndryshim në strukturën e tregut shqiptar të automjeteve, ku vendet aziatike, veçanërisht Koreja e Jugut dhe Kina, po zënë një peshë të konsiderueshme përkrah tregjeve tradicionale europiane.