KRUJË – Zjarri në lagjen Abaze të Krujës vijon të jetë aktiv, ndërsa situata mbetet nën monitorim të vazhdueshëm nga strukturat e emergjencave.

Gjatë natës, perimetri i zjarrit është zgjeruar, ndërsa flakët janë afruar pranë banesave, duke shkaktuar alarm te banorët e zonës.

Në terren ndodhen forca të shumta zjarrfikëse, të cilat po punojnë për izolimin dhe shuarjen e vatrave të zjarrit, si dhe për parandalimin e përhapjes së tyre drejt zonave të banuara.

Në mbështetje të strukturave të emergjencave janë angazhuar edhe Forcat e Armatosura, të cilat po marrin pjesë në operacionet për përballimin e situatës.

Efektivët e FA-së janë të angazhuar gjithashtu në zona të tjera të prekura nga zjarret, përfshirë Lurën, Mallakastrën, Vaun e Dejës, Mirditën, si dhe zonat e Priskës, Dajtit dhe Farkës në Tiranë.

Operacionet në terren vijojnë, ndërsa prioritet mbetet mbrojtja e banesave dhe e zonave të banuara nga përhapja e flakëve.