BRUKSEL – Bashkimi Evropian ka shtyrë sërish zbatimin e ETIAS (European Travel Information and Authorisation System), sistemit të ri elektronik të autorizimit të udhëtimit për shtetasit e vendeve që aktualisht përfitojnë nga hyrja pa viza në zonën Schengen.

Sistemi ishte parashikuar të niste në vitin 2027, por tashmë autoritetet evropiane nuk kanë përcaktuar një datë konkrete për hyrjen e tij në fuqi.

ETIAS do të jetë i detyrueshëm për udhëtarët nga vende që gëzojnë regjimin pa viza për qëndrime të shkurtra në Evropë, përfshirë Mbretërinë e Bashkuar, Shtetet e Bashkuara, Kanadanë dhe Australinë. Përpara udhëtimit, këta shtetas do të duhet të pajisen me një autorizim elektronik.

Problemet teknike shtyjnë zbatimin

Shtyrja lidhet me vështirësitë teknike dhe vonesat në zhvillimin e sistemeve të reja evropiane për menaxhimin dhe kontrollin e kufijve.

Autoritetet e BE-së kanë bërë të ditur se ETIAS nuk është aktualisht funksional dhe nuk po pranohen aplikime.

Data e saktë e nisjes do të bëhet publike disa muaj përpara se sistemi të fillojë zyrtarisht të zbatohet.

Udhëtarët nuk duhet të aplikojnë tani

Deri në hyrjen në fuqi të ETIAS, udhëtarët që përfitojnë nga regjimi pa viza mund të vijojnë të udhëtojnë sipas rregullave aktuale.

Autoritetet evropiane u bëjnë thirrje udhëtarëve që të mos aplikojnë dhe të mos kryejnë pagesa për ETIAS në këtë fazë.

Gjithashtu, udhëtarët këshillohen të tregojnë kujdes ndaj faqeve të internetit që pretendojnë se ofrojnë aplikime për ETIAS përpara se sistemi të jetë zyrtarisht funksional.

Për momentin, nuk ka një afat të ri zyrtar për nisjen e ETIAS.