AUSTRI – Paris Saint-Germain ka fituar për të dytin vit radhazi Superkupën e Evropës. Kampionët në fuqi të Champions League mposhtën Aston Villan me rezultatin 2-1, në një finale të zhvilluar në “Red Bull Arena” të Salzburgut.

PSG e nisi ndeshjen me ritëm të lartë dhe gjeti avantazhin në minutën e 20-të. Khvicha Kvaratskhelia realizoi një gol spektakolar me të djathtën, duke e dërguar topin nën traversë pas një aksioni të ndërtuar nga skuadra e Luis Enriques.

Aston Villa reagoi në fundin e pjesës së parë dhe arriti të barazojë në minutën e 45-të. Protagonist ishte 17-vjeçari Brian Madjo, i cili përfitoi nga krosi i John McGinn dhe goditi saktë topin, duke shënuar një gol të rëndësishëm në një prej ndeshjeve më të mëdha të karrierës së tij.

Në pjesën e dytë, Luis Enrique ndërhyri menjëherë duke aktivizuar Ousmane Dembélé. Ndryshimi rezultoi vendimtar.

Në minutën e 61-të, Dembélé asistoi për Désiré Doué, i cili kontrolloi topin dhe e dërgoi në rrjetë për 2-1. Goli u anulua fillimisht për pozicion jashtë loje, por pas verifikimit u konsiderua i rregullt dhe PSG riktheu avantazhin.

Unai Emery tentoi të ndryshonte rrjedhën e takimit me zëvendësime, duke aktivizuar mes të tjerëve edhe Tammy Abraham dhe Bogarde. Aston Villa kërkoi golin e barazimit, por mbrojtja e PSG-së rezistoi deri në fund.

Skuadra franceze pati gjithashtu një moment shqetësimi pas dëmtimit të Nuno Mendes, i cili u zëvendësua nga Lucas Hernández.

Me fërshëllimën e fundit, PSG festoi një tjetër trofe europian. Pas triumfit të sezonit të kaluar, kampionët e Evropës fitojnë për herë të dytë radhazi Superkupën e Evropës, duke nisur sezonin e ri në mënyrën më të mirë të mundshme.

Për Unai Emery, ndërkohë, Superkupa vijon të mbetet një trofe i paarritshëm, pavarësisht sukseseve të tij të shumta në Europa League.

PSG 2-1 Aston Villa ⚽ Kvaratskhelia 20’ ⚽ Madjo 45’ ⚽ Doué 61’