Situata e krijuar nga zjarret në zonat e Priskës dhe Farkës ka shkaktuar ndërprerje të energjisë elektrike në Stacionin e Pompave në Priskë, duke sjellë probleme edhe me furnizimin me ujë të banorëve.

Ujësjellës-Kanalizime Tiranë (UKT) ka njoftuar se, për shkak të ndërprerjes së energjisë elektrike, është ndërprerë furnizimi me ujë për abonentët në zonën e Priskës.

Ndërkohë, për shkak të situatës së krijuar, ndërprerje të furnizimit me ujë do të ketë edhe në zonën e Lundrës.

UKT bën me dije se po monitoron situatën dhe do të njoftojë qytetarët për rikthimin e furnizimit me ujë, sapo kushtet të normalizohen dhe energjia elektrike të rikthehet në stacionin e pompave.

“UKT do të dalë me një njoftim të dytë për rikthimin e situatës normale”, thuhet në njoftimin e institucionit.