Prokuroria Themelore në Prishtinë ka ndërmarrë veprime hetimore pas një deklarate kërcënuese ndaj deputetit Ramush Haradinaj. Sipas njoftimit zyrtar, një person i identifikuar si emigrant është shprehur publikisht se Haradinaj “duhet pushkatuar”.

Pas kërcënimit, Prokurori Kujdestar nga Departamenti i Përgjithshëm ka autorizuar Policinë e Kosovës, konkretisht Njësinë e Hetimeve të Përgjithshme (NJHP), për të nisur menjëherë punën për identifikimin e personit të dyshuar dhe për të ndërmarrë veprimet e nevojshme hetimore.

Prokurori i Shtetit, në bashkëpunim me Policinë e Kosovës, po punon për sqarimin e plotë të rrethanave të rastit dhe përcaktimin e përgjegjësisë së personit që ka bërë deklaratën kërcënuese.

“Prokuroria Themelore në Prishtinë do të vazhdojë të bashkëpunojë ngushtë me Policinë e Kosovës, me qëllim të identifikimit të personit përgjegjës, zbardhjes së plotë të rrethanave të rastit, si dhe do të ndërmarrë të gjitha veprimet e mëtejshme, konform dispozitave ligjore në fuqi”, thuhet në njoftimin e Prokurorisë.

Hetimet vijojnë për të përcaktuar rrethanat e plota të kërcënimit dhe identitetin e personit përgjegjës.