Kryeministri Edi Rama ka mbledhur këtë të mërkurë në Kuç të Vlorës kryetarët e bashkive të Partisë Socialiste, në një takim ku në fokus pritet të jetë reforma territoriale dhe riorganizimi i njësive të qeverisjes vendore.

Në takim marrin pjesë edhe ministri për Pushtetin Vendor, Ervin Demo, si dhe bashkëkryetari i Komisionit të Posaçëm Parlamentar, Arbjan Mazniku.

Sipas raportimeve, kryebashkiakët pritet të paraqesin propozimet e tyre, të mbledhura gjatë takimeve konsultative me qytetarët.

Në Kuç kanë mbërritur edhe kryetarja e Bashkisë Vlorë, Bruna Mersini, dhe kryetari i Bashkisë Himarë, Vangjel Tavo.

Reforma territoriale e propozuar nga Partia Socialiste ka hasur kundërshtime nga qytetarë dhe drejtues vendorë në disa bashki, ku janë zhvilluar protesta kundër shkrirjes së njësive vendore.

Sipas propozimit të PS-së, numri i bashkive në vend do të reduktohet nga 61 në 46.

Bashkitë që propozohet të shkrihen janë Fushë-Arrëz, Klos, Rrogozhinë, Dimal, Poliçan, Patos, Divjakë, Selenicë, Maliq, Këlcyrë, Memaliaj, Libohovë, Cërrik, Belsh dhe Përrenjas.