TIRANË, 11 gusht 2026 — Teknologjia po luan një rol gjithnjë e më të rëndësishëm në monitorimin e sigurisë rrugore dhe rendit publik në Shqipëri, sipas ministrit të Brendshëm, Besfort Lamallari.

Lamallari tha se Policia e Shtetit po përdor pajisje të avancuara elektronike për monitorimin e rrugëve dhe identifikimin në kohë reale të shkeljeve të rregullave të qarkullimit.

Radarët e gjeneratës së re, dronët vëzhgues dhe automjetet inteligjente janë ndër teknologjitë që, sipas ministrit, po përdoren për evidentimin e tejkalimit të shpejtësisë dhe shkeljeve të tjera që rrezikojnë sigurinë e udhëtarëve.

Lamallari theksoi gjithashtu se një nga objektivat strategjikë është shtrirja e plotë e infrastrukturës teknologjike dixhitale në qytetet kryesore të vendit.

“Me zbatimin e projektit #SmartCity do të bëjmë një kapërcim epokal për sigurinë rrugore dhe atë publike në tërësi në Shqipëri”, u shpreh ministri.

Sipas tij, digjitalizimi do të mundësojë një monitorim më të gjerë, jo vetëm të akseve rrugore, por edhe të hapësirave publike në të gjithë territorin.