Një 64-vjeçar mbeti i plagosur rëndë mesditën e kësaj të marte, pasi u përplas nga një autobus në aksin kombëtar Delvinë–Sarandë.

I plagosuri është Agim Vocka, banor i fshatit Bajkaj. Ai u dërgua fillimisht në spitalin e Sarandës, por për shkak të gjendjes së rëndë shëndetësore u vendos transportimi i tij me helikopter drejt Spitalit të Traumës në Tiranë.

Aksidenti ndodhi në kthesën që të çon drejt fshatit Bajkaj, pranë një pike karburanti. Autobusi i linjës Delvinë–Sarandë, i drejtuar nga Vangjel Zoto, dyshohet se përplasi 64-vjeçarin teksa ky i fundit po lëvizte në këmbë.

Pas aksidentit, drejtuesi i autobusit u largua nga vendngjarja, por u kap më vonë nga shërbimet e Policisë së Delvinës.

Në vendngjarje mbërritën shërbimet e Qarkullimit Rrugor të Sarandës, të cilat nisën hetimet për të zbardhur shkaqet dhe rrethanat e aksidentit.

Drejtuesi i autobusit iu nënshtrua testit të alkoolit dhe rezultoi se nuk kishte konsumuar alkool, me aparatin që shënoi 0.00 mg/l.

Ndërkohë, gjendja shëndetësore e 64-vjeçarit paraqitet e rëndë. Sipas mjekëve të spitalit të Sarandës, ai ka pësuar dëmtime të rënda në kokë dhe ndodhet në gjendje kome.

Për shkak të gjendjes së tij, u vendos transportimi urgjent drejt Spitalit të Traumës në Tiranë. Helikopteri u ul në pistën e Portit të Sarandës, ku i plagosuri u dërgua me ambulancë për t’u nisur më pas drejt kryeqytetit.

Foto arkiv