TIRANË – Drejtori i Përgjithshëm i Shërbimit Zjarrfikës, Arben Cara, ka paraqitur dorëheqjen nga detyra, e cila është zyrtarizuar me firmosjen e urdhrit të largimit gjatë ditës së sotme.

Lëvizja e bujshme vjen në një nga momentet më kritike të vitit për strukturat e emergjencës, ndërsa vendi po përballet me një situatë të rënduar nga dhjetëra vatra zjarri të shpërndara në të gjithë territorin.

Arsyet e paqarta dhe angazhimi deri në largim

Edhe pse arsyet zyrtare të dorëheqjes së Carës mbeten ende të paqarta, kjo lëvizje vjen pas disa ditësh angazhim intensiv publik në koordinimin e forcave operacionale dhe raportimin e situatës së flakëve në terren.

Arben Cara mbante drejtimin e Shërbimit Zjarrfikës që prej vitit 2021 ndërsa ka 21 vjet në shërbimin zjarrfikës.

Ai ka konfirmuar largimin nga drejtimi i shërbimit zjarrfikës dhe pohoi se vendimin e dorëheqjes e ka marrë dje.

Cara u shpreh se për arsye personale e ka parë të arsyeshme që të largohet nga ky post.