MILANO – Një ngjarje e rëndë është regjistruar në një klub nate në qytetin e Milanos, ku një balerinë italiane ka kallëzuar një klient 25-vjeçar me origjinë shqiptare për sulm seksual, duke pretenduar se ai i hodhi drogë në pije dhe e detyroi të kryente marrëdhënie seksuale nën efektin e saj.

Sipas dëshmisë së viktimës dhënë autoriteteve italiane, ngjarja ka ndodhur gjatë orëve të vona të së dielës, kur ajo ishte në orar zyrtar pune.

Klienti, i cili kishte rënë dakord me drejtuesit e lokalit për të kaluar rreth gjysmë ore në një dhomë private të lokalit, e ka dërguar atje larg syve të personelit të sigurisë.

Ndërhyrja e karabinierëve dhe hetimet në vazhdim

Alarmi u ngrit rreth orës 05:00 të mëngjesit të së hënës, pasi 25-vjeçari – i cili rezulton me precedentë të mëparshëm penalë – nisi të krijonte shqetësime për personelin e lokalit. Patrullat e para të karabinierëve mbërritën menjëherë në vendngjarje, duke marrë dëshminë e balerinës, e cila kishte arritur të largohej nga dhoma private.

Vajza u shoqërua nga ekipet mjekësore në një qendër të specializuar kundër dhunës, ku iu nënshtrua ekzaminimeve mjekësore dhe mori ndihmë psikologjike. Rezultatet e analizave mjekësore dhe biologjike, përfshirë sekuestrimin e rrobave të të dyja palëve, pritet të hedhin dritë mbi dinamikën e plotë të ngjarjes.

Prokuroria e Milanos ka nisur hetimet ndaj 25-vjeçarit, i cili aktualisht po hetohet në gjendje të lirë për veprën penale të dhunës seksuale, ndërsa autoritetet po presin formalizimin e plotë të denoncimit dhe marrjen e sërishme në pyetje të viktimës, e cila ndodhej në gjendje shoku në momentin e parë të ndërhyrjes. Corriere