E përndiqte me profile false dhe i kërkonte para, policia e Tiranës e kap në momentin e dorëzimit. Emri dhe detajet

TIRANË – Një 24-vjeçar është vënë në pranga në kryeqytet, pasi dyshohet se përmes profileve të rreme në rrjetet sociale ka përndjekur dhe kanosur një shtetas, duke e detyruar t’i dorëzojë një shumë parash.

Operacioni policor, i koduar “Accountet”, u finalizua nga specialistët e Sektorit për Hetimin e Krimeve Kibernetike, në bashkëpunim me Forcën e Posaçme Operacionale të Drejtorisë Vendore të Policisë Tiranë, nën drejtimin e Prokurorisë.

Në pranga ka rënë shtetasi Klevis Gega, 24 vjeç, banues në Tiranë. Ai u kap në flagrancë nga shërbimet e policisë pikërisht në momentin kur po merrte shumën monetare të kërkuar.

Sipas hetimeve paraprake, i riu kishte krijuar profile të falsifikuara në platformat virtuale, nëpërmjet të cilave kishte nisur një fushatë përndjekjeje dhe kanosjeje ndaj shtetasit me iniciale D. P., duke e shtrënguar psikologjikisht për t’i dhënë para.

Në cilësinë e provës materiale, autoritetet sekuestruan shumën e parave të marra në flagrancë, si dhe dy aparate celulare që përdoreshin për kryerjen e veprimtarisë kriminale.

Materialet procedurale i kanë kaluar Prokurorisë pranë Gjykatës së Shkallës së Parë të Juridiksionit të Përgjithshëm Tiranë. 24-vjeçari do të thellohet në përgjegjësi penale për veprat:

“Përndjekja”

“Shtrëngimi me anë të kanosjes për dhënien e pasurisë”

“Falsifikimi kompjuterik”

“Keqpërdorimi i pajisjeve”

Policia njofton se hetimet janë duke vijuar për të zbuluar nëse ka persona të tjerë të përfshirë në këtë rrjet zhvatjeje kibernetike.

DVP Tiranë/Finalizohet operacioni policor i koduar “Accountet”.

Përndoqi dhe kanosi një shtetas, nëpërmjet profileve të falsifikuara në rrjete sociale, me qëllim për t’i marrë një shumë parash, arrestohet në flagrancë 24-vjeçari.

Pas marrjes njoftim se një shtetas, në mënyrë të përsëritur, përndiqte dhe kanoste nëpërmjet platformave virtuale një shtetas, duke i kërkuar një shumë parash, specialistët e Sektorit për Hetimin e Krimeve Kibernetike, në bashkëpunim me Forcën e Posaçme Operacionale të DVP Tiranë, nën drejtimin e Prokurorisë, organizuan dhe finalizuan operacionin policor të koduar “Accountet”.

Në kuadër të operacionit u vu në pranga shtetasi K. G., 24 vjeç, banues në Tiranë, i cili u kap në flagrancë në momentin e marrjes së shumës monetare.

Nga veprimet hetimore dyshohet se ky shtetas, duke përdorur profile të falsifikuara në platformat virtuale, ka përndjekur dhe kanosur shtetasin D. P., duke e shtrënguar për t’i dhënë një shumë parash.

Në cilësinë e provës materiale u sekuestruan një shumë parash dhe 2 aparate celularë.

Vijon puna për identifikimin e personave të tjerë të përfshirë dhe dokumentimin e plotë të rastit.

Materialet procedurale iu referuan Prokurorisë, për veprat penale “Përndjekja”, “Shtrëngimi me anë të kanosjes për dhënien e pasurisë”, “Falsifikimi kompjuterik” dhe “Keqpërdorimi i pajisjeve”.