TIRANË – Shqipëria do të vijojë të përfshihet nga temperatura të larta gjatë ditës së sotme, nën ndikimin e masave ajrore të qëndrueshme dhe të nxehta.

Sipas parashikimit meteorologjik, moti do të jetë kryesisht i kthjellët, ndërsa vranësira të pakta deri mesatare priten kryesisht gjatë orëve të mesditës dhe pasdites, veçanërisht përgjatë zonave malore.

Temperaturat maksimale pritet të arrijnë deri në 41°C. Në Gjirokastër termometri parashikohet të shënojë 41°C, ndërsa në Shkodër dhe Berat temperaturat do të ngjiten deri në 40°C.

Edhe zonat e tjera të vendit do të përballen me temperatura të larta, duke bërë që dita të jetë veçanërisht e nxehtë në orët e mesditës dhe pasdites.

Sa i përket erës, ajo do të fryjë kryesisht nga veriu dhe veriperëndimi, me shpejtësi mesatare rreth 7 m/s. Përgjatë vijës bregdetare dhe në zonat luginore, era pritet të forcohet herë pas here, duke arritur deri në 14 m/s.

Në det parashikohet valëzim i forcës 1-3 ballë.

Me temperaturat që pritet të arrijnë deri në 40-41°C, veçanërisht në disa zona të vendit, këshillohet shmangia e ekspozimit të zgjatur në diell gjatë orëve më të nxehta të ditës.