BEOGRAD – Presidenti i Serbisë, Aleksandër Vuçiç, ka reaguar sërish lidhur me deklaratat e tij për mundësinë e ndryshimit të rrjedhës së lumit Ibër, çështje që ka shkaktuar reagime në Prishtinë dhe Tiranë.

Në një prononcim për transmetuesin publik serb RTS, Vuçiç e ka cilësuar ndryshimin e rrjedhës së Ibrit si një “çështje të brendshme të jona”, duke vënë në pikëpyetje përfshirjen e Shqipërisë në debat.

“Nuk e di se çfarë lidhjeje ka Ibri me Shqipërinë”, është shprehur presidenti serb.

Deklaratat e Vuçiç vijnë pas reagimeve të palës shqiptare dhe diskutimeve për përfshirjen e institucioneve evropiane në çështjen e lumit Ibër, i cili lidhet me sistemin ujor që furnizon edhe Liqenin e Ujmanit, një burim i rëndësishëm ujor për Kosovën.

Duke komentuar reagimet e krijuara pas deklaratës së tij, Vuçiç tha se do të pritet për të parë se çfarë konkretisht do të ndodhë lidhur me projektet e përmendura.

“Kemi një problem diku rreth Ribaric-it, le të shohim, le të shohim për çfarë bëhet fjalë dhe pastaj do të shohim”, deklaroi ai.

Vuçiç akuzon Prishtinën

Presidenti serb e lidhi reagimin ndaj deklaratave të tij edhe me zhvillimet politike dhe marrëdhëniet mes Beogradit dhe Prishtinës.

Sipas Vuçiç, pala shqiptare po përdor çështjen e lumit Ibër për të larguar vëmendjen nga ato që ai i konsideron shkelje ndaj serbëve në Kosovë.

Ai pretendoi se serbët përballen me arrestime, presione dhe dëmtime të pronave, ndërsa akuzoi institucionet e Kosovës dhe faktorë ndërkombëtarë për veprime që, sipas tij, synojnë dobësimin e institucioneve të Serbisë në Kosovë.

“Shqiptarët duhet ta bëjnë këtë për të mbuluar të gjitha krimet e tyre kundër popullit serb – arrestime, ngacmime, ngacmime të serbëve, shembje shtëpish, rrahje fjalë për fjalë të serbëve vetëm sepse serbët janë kudo”, deklaroi Vuçiç.

Ai shtoi se, sipas tij, “terrori po kryhet së bashku me organet e bashkësisë ndërkombëtare për të minuar çdo ditë institucionet e Serbisë në Kosovë dhe për të forcuar institucionet që nuk kanë lidhje me të drejtën ndërkombëtare”.

Deklaratat e presidentit serb vijnë në një moment kur çështja e menaxhimit të burimeve ujore të lumit Ibër ka marrë një dimension të ri politik, për shkak të ndikimit të mundshëm që ndryshimi i rrjedhës së tij mund të ketë në Kosovë.

Debati pritet të vijojë edhe në nivel diplomatik, ndërsa palët kanë paraqitur qëndrime të ndryshme mbi natyrën dhe pasojat e një ndërhyrjeje të mundshme në rrjedhën e lumit.