TIRANË – Protesta e aktivistëve dhe qytetarëve në Tiranë ka hyrë këtë të hënë në ditën e 72-të, ndërsa tubimi vijoi edhe mbrëmjen e sotme me grumbullimin e protestuesve në qendër të kryeqytetit.

Si çdo pasdite, pas orës 19:00, protestuesit u mblodhën fillimisht në sheshin “Skënderbej”, ku nisën thirrjet kundër qeverisë, mes tyre: “Ju erdhi fundi”, “Shqipëri e re” dhe “Rama jep dorëheqjen”.

Pas grumbullimit në shesh, protestuesit u nisën në marshim drejt Bulevardit “Dëshmorët e Kombit”. Tubimi vijoi përpara godinës së Kryeministrisë, ku protestuesit zhvilluan fjalime dhe përsëritën thirrjet kundër qeverisë.

Kërkesa kryesore e protestuesve mbetet dorëheqja e Kryeministrit Edi Rama dhe e qeverisë aktuale.

Sipas organizimit të protestës, pas fjalimeve përpara Kryeministrisë, protestuesit pritet të vijojnë marshimin në rrugët e Tiranës.

Protesta e sotme shënon ditën e 72-të të tubimeve të njëpasnjëshme të aktivistëve dhe qytetarëve në kryeqytet.