DURRËS – Një 43-vjeçar i shpallur në kërkim ndërkombëtar është arrestuar në Durrës, në kuadër të operacionit të koduar “Wanted 37”. Policia njofton se arrestimi u krye me qëllim ekstradimin e tij drejt Italisë.

Në pranga ka rënë Kastriot Dyrmishi, alias Kastriot Dermishi, banues në Durrës. Sipas autoriteteve shqiptare, ai ishte shpallur në kërkim ndërkombëtar pasi Gjykata e Apelit në Firence e kishte dënuar me 14 vite burg për veprën penale “Trafikimi i lëndëve narkotike”.

Nga dënimi i dhënë, 43-vjeçarit i kanë mbetur për të vuajtur edhe 12 vite, 9 muaj dhe 24 ditë burgim.

Policia bën me dije se arrestimi u realizua në lagjen nr. 17/1 të Durrësit, pas koordinimit informativ dhe operacional me autoritetet italiane, përmes Interpol Tiranës.

Pas arrestimit, Interpol Tirana, në bashkëpunim me homologët italianë, vijon procedurat ligjore për ekstradimin e Dyrmishit drejt Italisë, ku pritet të vuajë pjesën e mbetur të dënimit.

"Durrës/Operacione të njëpasnjëshme për lokalizimin dhe kapjen e shtetasve të shpallur në kërkim ndërkombëtar.

Finalizohet operacioni i koduar “ëanted 37”. Lokalizohet dhe kapet një shtetas i dënuar në Itali, me 14 vjet burgim, për trafikim të lëndëve narkotike.

Si rezultat i koordinimit informativ dhe operacional me homologët në Itali, nëpërmjet Interpol Tiranës, si dhe i veprimeve të shpejta policore, specialistët e Seksionit për Mbështetjen Operacionale të Hetimit finalizuan operacionin e koduar “Wanted 37”, si rezultat i të cilit, u kap në lagjen nr. 17/1, dhe u arrestua me qëllim ekstradimin në Itali, shtetasi Kastriot Dyrmishi, alias Kastriot Dermishi, 43 vjeç, banues në Durrës.

Ai ishte shpallur në kërkim ndërkombëtar, pasi Gjykata e Apelit, Firenze, Itali, e ka dënuar me 14 vjet burgim, për veprën penale “Trafikimi i lëndëve narkotike”, dënim nga i cili i kanë mbetur për të vuajtur 12 vjet, 9 muaj dhe 24 ditë burgim. Interpol Tirana, në bashkëpunim me homologët italianë, vijon procedurat për ekstradimin e këtij shtetasi, në Itali."