FIER — Një ngjarje e rëndë ka tronditur sistemin penitenciar, ku i paraburgosuri Denis Bajri (alias Brajovic) ka dëshmuar para hetuesve se kundërshtari i tij i përbetuar, i shumëkërkuari Ibrahim Lici, ka urdhëruar një atentat me thikë ndaj tij brenda qelisë në burgun e sigurisë së lartë të Fierit.

Sipas dëshmisë së siguruar nga gazetarja Klodiana Lala, ngjarja ka ndodhur kur i dënuari Aldo Gjini është paraqitur në qelinë e Bajrit i shoqëruar nga Jurgen Zotaj. Zoto i ka dhënë një aparat celular për të komunikuar, ku në linjë ka qenë Lici.

"Aldo Gjini kërkoi të më takonte. Ai erdhi në qelinë time bashkë me Jurgen Zoton. Ky i fundit më dha një telefon. Në linjë ishte Ibrahim Lici. Ai më tha: ‘Jeta jote kaq e pat!’. Në atë moment Zoto tentoi të më sulmonte me thikë," ka deklaruar Denis Bajri para grupit hetues.

Si pasojë e përleshjes fizike që pasoi, si Bajri ashtu edhe Zotaj mbetën të plagosur dhe u dërguan për të marrë ndihmë mjekësore.

Pas incidentit, Drejtoria e Përgjithshme e Burgjeve ka ndërmarrë masa të rrepta disiplinore. Komisioni i Disiplinës ka pezulluar dhe referuar në prokurori tetë efektivë policie për shpërdorim detyre, për shkak se kanë lejuar lëvizjet e parregullta të të burgosurve mes godinave dhe futjen e telefonave celularë, sende të ndaluara rreptësisht në ambientet e paraburgimit.

Ndërkohë, autoritetet kanë vendosur izolimin 3-mujor për Aldo Gjinin dhe Jurgen Zotaj, të cilët janë transferuar për arsye sigurie respektivisht në burgun e Drenovës dhe atë të Burrelit, ndërsa Shërbimi për Çështjet e Brendshme dhe Ankesat (SHÇBA) vijon hetimet e thelluara mbi ngjarjen.