TIRANË — Pas deklaratave të presidentit ukrainas Volodymyr Zelensky në Beograd, ku ai rikonfirmoi qëndrimin e Ukrainës për mosnjohjen e pavarësisë së Kosovës, protestuesit në Tiranë kanë ndërmarrë një gjest simbolik ndaj Ukrainës.

Gjatë marshimit të protestës së 71-të, protestuesit kanë hequr mbishkrimin “Rruga Ukraina e Lirë” dhe në vend të tij kanë vendosur “Rruga Dardania e Lirë”.

Veprimi është shoqëruar me thirrje në mbështetje të Ushtrisë Çlirimtare të Kosovës (UÇK), ndërsa protestuesit kanë kaluar pranë ambasadave të Serbisë dhe Ukrainës në Tiranë.

“UÇK, UÇK” kanë brohoritur protestuesit gjatë marshimit, duke e kthyer lëvizjen përmes kryeqytetit në një reagim simbolik ndaj qëndrimit të përsëritur të Kievit për Kosovën.

Protestuesit kanë shprehur pakënaqësi ndaj deklaratave të Zelenskyt, duke vënë në dukje se Kosova ka mbështetur Ukrainën që prej nisjes së pushtimit rus, ndërsa Ukraina vazhdon të mos e njohë pavarësinë e Kosovës.

Ndryshimi i emërtimit të rrugës dhe thirrjet para dy ambasadave vijnë në një moment kur qëndrimi i Ukrainës ndaj Kosovës është rikthyer në qendër të debatit publik pas vizitës së Zelenskyt në Serbi.

Protesta e 71-të kundër qeverisë shqiptare vijoi me marshim në rrugët e Tiranës, ku krahas kërkesave politike të protestuesve u shfaqën edhe mesazhe lidhur me zhvillimet në Kosovë, Serbi dhe Ukrainë.