TEHERAN — Presidenti iranian Masoud Pezeshkian u takua me udhëheqësin suprem të Iranit, Mojtaba Khamenei, në fund të korrikut, raportuan të dielën mediat shtetërore iraniane, ndërsa autoritetet paralajmëruan se do të publikojnë në të ardhmen pamje të Khameneit në publik dhe në takime me komandantët ushtarakë.

Takimi, sipas raportimeve, u zhvillua në kuadër të fillimit të vitit të tretë të presidencës së Pezeshkianit dhe trajtoi çështje të rëndësishme ushtarake dhe ekonomike. Në diskutime u përfshinë sigurimi i burimeve, menaxhimi i valutës, përdorimi i energjisë dhe marrëdhëniet ekonomike me partnerët e huaj.

Raportimi vjen në një kohë kur mungesa e Khameneit në publik ka ushqyer spekulime të vazhdueshme për gjendjen e tij shëndetësore.

Mojtaba Khamenei nuk është parë publikisht që prej marrjes së detyrës së udhëheqësit suprem në mars. Në prill, burime pranë rrethit të tij i thanë Reuters se ai kishte pësuar dëmtime të rënda në fytyrë dhe këmbë gjatë sulmit të 28 shkurtit, në të cilin u vra babai dhe paraardhësi i tij, Ali Khamenei.

Pezeshkian ka dhënë deklarata të ndryshme gjatë javëve të fundit për kontaktet e tij me udhëheqësin suprem. Më 21 korrik ai tha se ndërveprimi me Khamenein po rritej “ditë pas dite”, ndërsa më vonë foli për vështirësi të mëdha në komunikimin me të.

Ky është të paktën takimi i dytë i raportuar mes dy drejtuesve. Në maj, Pezeshkian deklaroi se kishte zhvilluar një takim me Khamenein që kishte zgjatur rreth dy orë e gjysmë. Në atë kohë, presidenti iranian e përshkroi takimin si të afërt dhe miqësor.

Ndërkohë, një zyrtar i lartë i forcës paraushtarake Basij tha të dielën se pamjet e Khameneit do të publikohen në të ardhmen.

Zëvendëskryetari i Basij, Qasem Qoraishi, tha se materialet do ta tregojnë udhëheqësin suprem në publik, në rrugë dhe gjatë takimeve me komandantët e forcave të armatosura.

Njoftimi duket se synon gjithashtu t’u përgjigjet spekulimeve mbi gjendjen e Khameneit, i cili, ndryshe nga paraardhësi i tij, ka mbajtur një profil jashtëzakonisht të ulët publik që prej marrjes së detyrës.

Për momentin, autoritetet iraniane nuk kanë dhënë një datë konkrete për publikimin e pamjeve të reja.