KOSOVË — Presidenti i Serbisë, Aleksandar Vuçiç, ka paralajmëruar një ndërhyrje të mundshme në rrjedhën e lumit Ibër, në një deklaratë që mund të rrisë tensionet mes Beogradit dhe Prishtinës.

Sipas mediave serbe, Vuçiç tha se autoritetet në Beograd kanë angazhuar ekspertë dhe inxhinierë për të shqyrtuar mundësinë e ndryshimit të rrjedhës së lumit, duke e lidhur këtë veprim me atë që ai i cilësoi si “keqtrajtim” të serbëve në Kosovë.

“Duhet t’ju njoftoj, ne kemi ftuar tashmë ekspertë që merren me këtë, sektorin e ndërtimit, inxhinierët dhe të gjithë të tjerët”, tha Vuçiç.

“Le të shohim çfarë do të bëjnë shqiptarët dhe si do të sillen pas këtij veprimi?”, shtoi ai.

Presidenti serb nuk dha detaje mbi mënyrën se si do të realizohej një ndërhyrje e tillë dhe as nuk konfirmoi nëse ajo do të zbatohet.

Çështja është veçanërisht e ndjeshme për shkak të rëndësisë së sistemit të ujit të Ibër-Lepencit. Liqeni i Ujmanit, i krijuar nga diga mbi lumin Ibër, është një burim i rëndësishëm uji për Kosovën dhe lidhet gjithashtu me furnizimin me ujë të zonave të banuara dhe prodhimin e energjisë elektrike.

Deklaratat e Vuçiçit vijnë në një periudhë tensionesh të vazhdueshme mes Serbisë dhe Kosovës. Beogradi dhe Prishtina vazhdojnë të kenë mosmarrëveshje për statusin e Kosovës dhe për çështje që lidhen me komunitetin serb në veri të vendit.

Deri tani, nga autoritetet e Kosovës nuk ka pasur një reagim zyrtar ndaj deklaratave të presidentit serb.