TIRANË, 9 gusht 2026 – Policia Rrugore e Tiranës ka intensifikuar kontrollet ndaj drejtuesve të motomjeteve, në kuadër të masave për parandalimin e aksidenteve dhe rritjen e sigurisë në rrugë.

Gjatë kontrolleve të zhvilluara në dy ditët e fundit, janë evidentuar 19 shtetas që drejtonin motomjete elektrike pa lejen përkatëse të drejtimit. Për këta persona ka nisur procedimi penal për veprën penale “Drejtimi i automjeteve në mënyrë të parregullt”, ndërsa motomjetet janë sekuestruar.

Kontrollet janë përqendruar veçanërisht te shkeljet që lidhen me manovrat e rrezikshme, përdorimin e kaskës dhe qarkullimin në hapësira të dedikuara për këmbësorët apo biçikletat.

Në total, shërbimet e Policisë Rrugore kanë vendosur 530 masa administrative për shkelje të ndryshme të rregullave të qarkullimit.

Sipas Policisë, masat e vendosura përfshijnë:

371 masa për mosvendosjen e kaskës mbrojtëse; 76 masa për qarkullim në korsitë e dedikuara për biçikleta dhe në hapësirat për këmbësorët; 28 masa për kryerje manovrash të rrezikshme dhe mosrregullim të shpejtësisë në qendrat e banuara; 21 masa për shkaktim zhurmash përmes sistemit të shkarkimit të gazrave; 18 masa për motomjete pa shenja dalluese ose targa; 10 masa për qarkullim me shpejtësi mbi normat e lejuara; 6 masa për drejtim pa leje drejtimi përkatëse.

Policia Rrugore bën me dije se kontrollet do të vijojnë në mënyrë të pandërprerë, me fokus parandalimin e ngjarjeve rrugore dhe evidentimin e shkeljeve që cenojnë sigurinë e përdoruesve të rrugës.

Në apelimin e saj, Policia u kërkon drejtuesve të motomjeteve të respektojnë rregullat e qarkullimit, të pajisen me lejen përkatëse të drejtimit, të përdorin kaskën mbrojtëse dhe të shmangin manovrat e rrezikshme.