KORÇË, 9 gusht 2026 – Janë publikuar pamjet e arrestimit të 20-vjeçarit Kristjan Sterjo, i dyshuar për vrasjen e 21-vjeçarit Joan Zuko në Korçë.

Sterjo u arrestua gjatë natës nga shërbimet e Policisë së Korçës, në bashkëpunim me Forcat Speciale RENEA. Sipas të dhënave të bëra publike, ai u lokalizua pranë Mitropolisë, në momentin që po kthehej drejt banesës.

Në pamjet e arrestimit dëgjohet një prej efektivëve të policisë që i drejtohet të dyshuarit me urdhrin: “Shtrihu në tokë”, para se ai të prangoset.

Ngjarja e rëndë ndodhi pasditen e 8 gushtit, në lagjen nr. 15 të Korçës, pas një konflikti mes disa personave. Sipas Policisë, përplasja për motive të dobëta përshkallëzoi deri në përdorimin e armës së zjarrit, duke shkaktuar vdekjen e 21-vjeçarit Joan Zuko.

Gjatë operacionit për kapjen e tij, Policia bëri të mundur edhe sekuestrimin e një pushke automatike, e cila dyshohet se është përdorur në ngjarje.

Ndërkohë, hetuesit po punojnë për të zbardhur motivin dhe dinamikën e plotë të konfliktit. Sipas të dhënave paraprake, përplasja mes dy të rinjve lidhej me disa episode të mëparshme, ndërsa një nga pistat e hetimit lidhet me pretendimin se viktima kishte ngacmuar të dashurën e autorit të dyshuar.

Po ashtu, po verifikohen edhe konflikte të mëparshme mes dy të rinjve, të cilët dyshohet se kishin pasur përplasje të vazhdueshme.

Grupi hetimor, nën drejtimin e Prokurorisë, vijon hetimet për dokumentimin e plotë të ngjarjes dhe përcaktimin e përgjegjësive ligjore.