GJERMANI – Inteligjenca artificiale po përdoret gjithnjë e më shumë nga qytetarët gjermanë për planifikimin e pushimeve, nga përzgjedhja e destinacionit deri te kërkimi i akomodimit, aktiviteteve dhe restoranteve.

Sipas një njoftimi të shoqatës së industrisë digjitale Bitkom, pothuajse një në katër qytetarë gjermanë ka përdorur sugjerime të Inteligjencës Artificiale për të zgjedhur destinacionin e udhëtimit ose vendin ku do të kalojë pushimet.

Të dhënat janë pjesë e një ankete përfaqësuese me rreth 1,000 persona mbi moshën 16 vjeç.

Rreth 19% e të anketuarve deklaruan se kanë përdorur IA për të kërkuar akomodime, si dhe bileta avioni apo treni.

Nga listat e udhëtimit te këshillat për destinacionet

Përdorimi i Inteligjencës Artificiale shtrihet edhe në përgatitjet para nisjes. Sipas anketës, 6% e të pyeturve e kanë përdorur IA për të krijuar lista me sendet që duhet të marrin me vete gjatë udhëtimit.

Ndërkohë, 5% janë drejtuar te IA për informacione dhe këshilla lidhur me destinacionin, përfshirë vaksinat dhe veçoritë kulturore të vendeve që planifikojnë të vizitojnë.

Edhe gjatë pushimeve, përdorimi i teknologjisë vijon. Rreth 17% e të anketuarve kanë përdorur Inteligjencën Artificiale për të kërkuar informacion mbi ekskursione dhe aktivitete të ndryshme, ndërsa 21% kanë kërkuar rekomandime për restorante.

Një tjetër përdorim i përhapur lidhet me fotografitë. 25% e të anketuarve thanë se kanë përdorur programe të Inteligjencës Artificiale për të përmirësuar fotografitë e tyre të pushimeve.

Të dhënat tregojnë se IA po shndërrohet gradualisht në një mjet të përdorur jo vetëm për planifikimin e udhëtimeve, por edhe për marrjen e informacionit dhe rekomandimeve gjatë qëndrimit në destinacion.