VLORË – Renardo Nallbani, i shpallur në kërkim prej vitit 2024 në kuadër të dosjes së inceneratorit të Tiranës, është arrestuar në një vilë në Palasë.

Operacioni policor, i koduar “Vila”, u finalizua nga Forcat Operacionale të Drejtorisë Vendore të Policisë Vlorë, në bashkëpunim me Drejtorinë e Forcës së Posaçme Operacionale në Departamentin e Policisë Kriminale dhe Forcën Kombëtare të Sigurisë, Njësia Fier.

Sipas Policisë, 50-vjeçari u lokalizua në një vilë në Palasë pas informacioneve të siguruara në rrugë operative mbi vendndodhjen e tij. Pas ndërhyrjes, shërbimet operacionale bënë të mundur kapjen dhe arrestimin e tij.

Nallbani ishte shpallur në kërkim pasi në korrik të vitit 2024, Gjykata e Posaçme e Shkallës së Parë për Korrupsionin dhe Krimin e Organizuar kishte caktuar ndaj tij masën e sigurisë “Arrest në burg”.

Sipas vendimit të gjykatës, ndaj tij rëndojnë akuzat për veprat penale “Pastrimi i produkteve të veprës penale ose veprimtarisë kriminale”, kryer në bashkëpunim, në kuadër të grupit të strukturuar kriminal, si dhe “Kryerja e veprave penale nga organizata kriminale dhe grupi i strukturuar kriminal”.

Arrestimi i Nallbanit është pjesë e operacioneve të njëpasnjëshme të strukturave të Policisë së Vlorës për lokalizimin dhe kapjen e personave të shpallur në kërkim.