Pas ngjarjes së rëndë që tronditi Korçën këtë të shtunë të gushtit, ku 20-vjeçari Joan Zuko humbi jetën pasi u qëllua me armë zjarri, ka reaguar Mitropoliti i Korçës, Anastasi.

Sipas të dhënave paraprake, për ngjarjen dyshohet shoku i tij i fëmijërisë, Kristian Sterjo, ndërsa hetimet vijojnë për zbardhjen e plotë të rrethanave.

Në një mesazh të ndjerë, Mitropoliti ka dënuar dhunën dhe ka bërë apel për respektimin e jetës njerëzore, të cilën e ka cilësuar si një dhuratë të shenjtë.

“Jeta njerëzore është dhuratë e shenjtë e Perëndisë dhe askush nuk ka të drejtë ta shuajë atë. Asnjë konflikt, asnjë zemërim dhe asnjë arsye nuk mund ta justifikojë veprimin që merr jetën e një njeriu”, thuhet në reagimin e tij.

Mitropoliti ka ndalur gjithashtu te dhimbja që ngjarje të tilla lënë jo vetëm te familjet e përfshira, por në të gjithë shoqërinë.

“Kur një i ri vret një të ri, shoqëria qan për të dy”, përfundon mesazhi, i cili përcjell një apel për paqe, përmbajtje dhe respekt më të madh ndaj jetës njerëzore.