KRUJË – Ministri i Brendshëm, Besfort Lamallari, ka reaguar për situatën e krijuar nga zjarri në Krujë, duke bërë me dije se Policia e Shtetit ka arrestuar personin e dyshuar për zjarrvënien.

Përmes një reagimi, Lamallari deklaroi se personi i arrestuar do të përballet me pasojat ligjore, ndërsa theksoi se autoritetet kanë marrë masa për evakuimin e banorëve që ndodhen në afërsi të vatrës së zjarrit.

Sipas ministrit, Policia e Shtetit ka vepruar me kërkesë të pushtetit vendor për të garantuar sigurinë e banorëve, ndërsa forcat në terren vijojnë operacionin për neutralizimin e rrezikut.

Reagimi i ministrit Lamallari:

“Vijojmë të ndjekim nga afër situatën e krijuar nga zjarri në Krujë, i cili edhe këtë herë është shkaktuar nga dora e njeriut. Policia e Shtetit e ka arrestuar tashmë zjarrvënësin dhe ai do të përballet me masat e rënda ligjore për këtë vepër penale.

Me kërkesë të pushtetit vendor, strukturat policore kanë marrë masat për evakuimin e banorëve në afërsi të vatrës së zjarrit. Forcat janë në terren dhe çdo mjet është vënë në dispozicion për neutralizimin e rrezikut.”

– deklaroi ministri i Brendshëm, Besfort Lamallari.