Korçë – Banorët e lagjes nr 15 në qytetin e Korçës janë tronditur nga ajo që ndodhi rreth dy orë më parë në zonën ku jetojnë prej vitesh.

Ata shprehen të shokuar dhe të shqetësuar dhe pohojnë se nuk kanë pasur ngjarje të tjera të tilla.

Një banor tregon se jetojnë në një lagje të qetë, por tani janë të frikësuar.

"Tjetri erdhi, e vrau dhe iku, normal që jemi të shqetësuar", shprehet ai në videon që shihni më poshtë.

Çfarë deklaroi para pak policia lokale

Rreth orës 16:30, në lagjen nr. 15, në rrugën “Viktor Eftimiu”, Korçë, ka ndodhur një konflikt ndërmjet disa personave, i cili është përshkallëzuar në përdorimin e armës së zjarrit.

Si pasojë e të shtënave, ka humbur jetën shtetasi J. Z., rreth 20 vjeç, banues në lagjen nr. 14, Korçë.

Si rezultat i veprimeve të shpejta hetimore dhe operative të kryera nga shërbimet e Policisë në vendngjarje, është bërë i mundur identifikimi i autorit të dyshuar, i cili është larguar nga vendngjarja menjëherë pas krimit.

Shërbimet e Policisë janë vënë në ndjekje të tij, kanë rrethuar zonën dhe vijojnë kontrollet intensive për lokalizimin dhe kapjen e autorit të dyshuar.

Ndërkohë, shërbimet e Policisë kanë shoqëruar në Komisariat, për veprime të mëtejshme procedurale, tre shtetas të dyshuar si të përfshirë në konfliktin ku humbi jetën 20-vjeçari.

Grupi hetimor, nën drejtimin e Prokurorisë, vijon veprimet në vendngjarje për sqarimin e plotë të rrethanave të ngjarjes, dokumentimin ligjor të saj, si dhe identifikimin e të gjithë personave të përfshirë.