MALLAKASTËR, 8 gusht 2026 – Është riaktivizuar një vatër zjarri në fshatin Koilac të Mallakastrës, ndërsa flakët po përhapen në një sipërfaqe të konsiderueshme dhe kanë marrë drejtim nga zonat e banuara.

Sipas informacioneve paraprake, era ka favorizuar përhapjen e zjarrit, duke rritur rrezikun për banesat pranë zonës së përfshirë nga flakët.

Për shkak të situatës, forcat e Policisë kanë ndërhyrë për evakuimin e disa familjeve nga zonat që paraqesin rrezik.

Deri në këto momente, raportohet për dëme në bimësi, ndërsa strukturat e emergjencave dhe forcat operacionale janë angazhuar për izolimin dhe shuarjen e flakëve.

Zjarri po përhapet në drejtim të fshatrave Panahor, Hekal, Ngraçan dhe Riban, ndërsa ekipet në terren po punojnë për të parandaluar afrimin e flakëve drejt banesave.

Paralelisht, grupi hetimor ka nisur verifikimet për përcaktimin e shkakut të rënies së zjarrit.

Situata vijon të monitorohet, ndërsa ndërhyrjet për shuarjen e flakëve vazhdojnë.