FUSHË-KRUJË, 8 gusht 2026 – Detaje të reja janë zbardhur lidhur me shpërthimin me lëndë plasëse në derën e banesës së një 72-vjeçari në zonën e Tufinës, ndërsa Policia ka shpallur në kërkim tre vëllezër të dyshuar për ngjarjen.

Në kërkim janë shpallur Ervis Alla, Altin Alla dhe Maksim Alla, të tre nga Fushë-Kruja. Ata dyshohen se kanë vendosur një sasi lënde plasëse në derën e banesës së 72-vjeçarit, duke shkaktuar dëme të pakta materiale.

Sipas të dhënave paraprake të hetimit, shkak i ngjarjes dyshohet të jetë një borxh i papaguar për disa mobilie të porositura nga djali i të moshuarit në biznesin e tre vëllezërve.

Dyshohet se, pas konflikteve të krijuara për shlyerjen e shumës së parave, tre vëllezërit kanë udhëtuar me një automjet drejt Tufinës dhe kanë vendosur lëndën plasëse në derën e banesës.

Në kuadër të hetimeve, Policia po analizon edhe pamjet e kamerave të sigurisë në zonë, me qëllim gjurmimin e automjetit të përdorur para dhe pas shpërthimit.

Ndërkohë, vijojnë veprimet hetimore për dokumentimin e plotë të rrethanave të ngjarjes, përcaktimin e përgjegjësive dhe lokalizimin e kapjen e tre personave të shpallur në kërkim.

Materialet procedurale i janë referuar Prokurorisë për veprime të mëtejshme.