KAVAJË, 8 gusht 2026 – Një konflikt mes dy personave në zonën e Spillesë, Rrogozhinë, ka përfunduar me ndërhyrjen e Policisë dhe arrestimin e Neldi Hallullit, 31 vjeç, i cili dyshohet se tentoi të vriste me armë zjarri Indrit Ramën, 38 vjeç.

Sipas Policisë, pas marrjes së informacionit në rrugë operative për një konflikt që po ndodhte në zonë, shërbimet e Komisariatit të Policisë Kavajë dhe Postës së Policisë Rrogozhinë ndërhynë menjëherë për të parandaluar përshkallëzimin e situatës.

Gjatë ndërhyrjes, efektivët kapën në flagrancë Neldi Hallullin, i cili në atë moment mbante një armë zjarri tip kallashnikov.

Nga veprimet e para hetimore dyshohet se Hallulli ishte konfliktuar me Indrit Ramën dhe, në vijim të konfliktit, kishte tentuar ta vriste atë me armë zjarri.

Policia sekuestroi armën e zjarrit kallashnikov, së bashku me municion luftarak, si provë materiale.

Ndërhyrja në kohë e shërbimeve të Policisë, sipas autoriteteve, parandaloi përshkallëzimin e konfliktit dhe shmangu pasoja më të rënda për jetën e Indrit Ramës.

Ndërkohë, edhe Indrit Rama është proceduar penalisht për veprën penale “Dëmtime të tjera me dashje”. Sipas Policisë, Rama ka goditur me grushte Neldi Hallullin, duke i shkaktuar dëmtime të lehta trupore.

Materialet procedurale i janë referuar Prokurorisë për veprime të mëtejshme hetimore.

Njoftimi

Kavajë/Ndërhyrja në kohë e shërbimeve të Policisë parandaloi përshkallëzimin e konfliktit me armë zjarri.

Kapet në flagrancë gjatë konfliktit me armë zjarri dhe vihet në pranga një 31-vjeçar, i cili tentoi të vriste me armë zjarri një 38-vjeçar.

Sekuestrohet në cilësinë e provës materiale arma e zjarrit kallashnikov me municion luftarak.

Procedohet penalisht dhe shtetasi tjetër i përfshirë në konflikt.

Pas marrjes së informacionit në rrugë operative se në zonën e Spillesë, Rrogozhinë, po ndodhte një konflikt, shërbimet e Policisë u organizuan dhe ndërhynë menjëherë për parandalimin e përshkallëzimit të konfliktit.

Si rezultat i veprimeve të shpejta dhe të koordinuara të shërbimeve të Komisariatit të Policisë Kavajë dhe Postës së Policisë Rrogozhinë, u bë e mundur kapja në flagrancë e shtetasit N. H. Në momentin e ndërhyrjes së shërbimeve të Policisë, ky shtetas mbante një armë zjarri, “Kallashnikov”.

Nga veprimet e para hetimore dyshohet se shtetasi N. H. kishte pasur një konflikt me shtetasin I. R. dhe, në vijim të konfliktit, dyshohet se kishte qëllim ta vriste atë.

Ndërhyrja e menjëhershme e shërbimeve të Policisë bëri të mundur parandalimin e një ngjarjeje të rëndë kriminale, duke shmangur përshkallëzimin e konfliktit dhe pasojat e rënda për jetën e 38-vjeçarit.

Po në vijim të veprimeve u procedua penalisht dhe shtetasi I. R., për "Dëmtime të tjera me dashje", sepse ka goditur me grushte shtetasin N. H., duke i shkaktuar dëmtime të lehta trupore.

Materialet procedurale iu referuan Prokurorisë për veprime të mëtejshme.