TIRANË- Mungesa e Selin Bollatit në videoklipin e këngës së re të Kristi Lamajt, “Tunde moj Selin”, ka ngritur pikëpyetje te ndjekësit, veçanërisht pas vërejtjes se dy ish-banorët e “Big Brother VIP Albania” nuk e ndjekin më njëri-tjetrin në rrjetet sociale.

Për herë të parë, Kristi Lamaj ka folur për këtë situatë gjatë një interviste në emisionin “Pushime On Top”, duke shpjeguar arsyen pse Selin nuk u shfaq në projektin muzikor.

Këngëtari tregoi se kishte komunikuar me Selin përpara xhirimeve dhe kishte menduar që ajo të ishte pjesë e disa skenave të videoklipit. Ideja ishte që balerina të shfaqej në momente të caktuara të koreografisë.

Megjithatë, sipas Kristit, plani nuk u realizua për shkak të angazhimeve të të dyve. Këngëtari ndodhej në një turne koncertesh në Evropë, ndërsa edhe Selin kishte axhendën e saj të ngjeshur.

Sipas tij, skenari i videoklipit ishte përgatitur më herët dhe, për shkak të pamundësisë për të koordinuar angazhimet, produksioni vijoi me konceptin fillestar, ku Kristi shfaqet i vetëm.

Megjithatë, shpjegimi i këngëtarit nuk i ka ndalur aludimet në rrjetet sociale. Mungesa e Selin në videoklip, e shoqëruar me faktin se dyshja nuk ndiqet më në rrjetet sociale, ka bërë që fansat të spekulojnë për një krisje të mundshme të miqësisë së tyre.

Kristi dhe Selin krijuan një miqësi të afërt gjatë qëndrimit në “Big Brother VIP Albania”, ndaj ndryshimi në raportin e tyre është vënë re nga ndjekësit.

Deri më tani, të dy kanë dhënë pak detaje publike për marrëdhënien e tyre, ndërsa arsyeja e “unfollow”-it vijon të mbetet e paqartë.