Aktori spanjoll Antonio Banderas ka folur për përvojën që ndryshoi mënyrën e tij të të parit të jetës, duke e cilësuar infarktin që pësoi në vitin 2017 si “gjënë më të mirë që më ka ndodhur ndonjëherë”.

Në një intervistë për “People”, Banderas tregoi se përballja me vdekjen e bëri të rivlerësonte prioritetet dhe të kuptonte se sa kohë kishte shpenzuar për gjëra që, në fund, nuk kishin rëndësi.

“Ishte sikur dikush më vendosi syze për të parë një realitet që më parë nuk e shihja”, u shpreh aktori.

Banderas pësoi infarkt në shtëpinë e tij në Surrey, Angli. Ai iu nënshtrua një ndërhyrjeje urgjente, gjatë së cilës mjekët i vendosën tre stenta në arterie.

Në ato momente kritike, pranë tij ishte partnerja Nicole Kimpel, e cila telefonoi menjëherë shërbimet e emergjencës pasi aktori përjetoi dhimbje të forta në gjoks. Ndërhyrja e shpejtë e ekipit mjekësor rezultoi vendimtare.

Pas këtij episodi, Banderas ndryshoi disa aspekte të rëndësishme të jetës së tij. Ai la duhanin, u distancua gradualisht nga ritmi i jetës në Hollywood dhe u rikthye për të jetuar në qytetin e tij të lindjes, Malaga.

“Kur vdekja të afrohet kaq shumë, e kupton me një qartësi të jashtëzakonshme se sa budalla je kur humbet kohën me gjëra që nuk meritojnë të jenë pjesë e jetës tënde”, tha ai.

Aktori theksoi se përvoja e ka bërë të ndryshojë edhe marrëdhënien me pasurinë dhe sendet materiale.

“Njerëzit jetojnë sikur nuk do të vdesin kurrë”, u shpreh Banderas, duke shtuar se tashmë nuk ka të njëjtin interes për të grumbulluar pasuri apo sende materiale. “E vetmja gjë që më intereson tani është përvoja e të jetuarit”, tha ai.

Banderas dhe Nicole Kimpel janë në një lidhje që prej vitit 2014, pas ndarjes së aktorit nga ish-bashkëshortja Melanie Griffith.

Jeta pas infarktit, edhe në ekran

Filozofia e re e jetës duket se është reflektuar edhe në zgjedhjet artistike të Banderas.

Aktori është pjesë e filmit biografik “Tony”, kushtuar kuzhinierit dhe autorit amerikan Anthony Bourdain. Rolin kryesor e interpreton Dominic Sessa, ndërsa Banderas luan Ciros, shefin e kuzhinës që shërbeu si mentor i Bourdain.

Edhe pse nuk e ka njohur personalisht Bourdain, Banderas ka thënë se e ka vlerësuar gjithmonë programin “No Reservations”, të cilin e konsideron më shumë si një program për jetën sesa thjesht për ushqimin.

Pas përvojës së tij shëndetësore, aktori thotë se shumë prej vendimeve të tij kalojnë tashmë përmes një pyetjeje të vetme:

“A ia vlen vërtet?”