TIRANË- Gjykata e Posaçme kundër Korrupsionit dhe Krimit të Organizuar ka lënë në burg Saimir Rosales Rodriguez, i njohur si “kimisti” i grupit të Frakullës, i cili u ekstradua nga Kolumbia drejt Shqipërisë një ditë më parë.

Rodriguez, 53 vjeç, shtetas kolumbian, ishte shpallur në kërkim ndërkombëtar pas largimit nga Shqipëria. Ai u arrestua nga autoritetet kolumbiane dhe, pas përfundimit të procedurave të ekstradimit, u transferua në Shqipëri për të vuajtur dënimin e dhënë nga drejtësia shqiptare.

Më 30 qershor 2026, Gjykata e Posaçme e dënoi Rodriguez me 14 vite burg, në kuadër të hetimeve të SPAK për dosjen e laboratorit të kokainës në Frakull të Fierit.

Sipas hetimeve të SPAK, 53-vjeçari kishte një rol të rëndësishëm në aktivitetin kriminal dhe ishte personi që do të merrej me përpunimin dhe ndarjen e kokainës në laboratorin e zbuluar në Frakull.

Laboratori i kokainës në Frakull

Çështja lidhet me zbulimin e një laboratori të ngritur në Frakull të Fierit, ku dyshohet se përpunohej kokainë.

Në kuadër të hetimit u arrestuan dhe u proceduan edhe persona të tjerë, të dyshuar për përfshirje në grupin kriminal.

Sipas të dhënave të dosjes hetimore, lënda narkotike ishte fshehur në një ngarkesë me pleh kimik, e cila kishte mbërritur fillimisht në Malin e Zi dhe më pas ishte transportuar drejt Shqipërisë.

Ekstradimi i Rodriguez nga Kolumbia i hap rrugë zbatimit të vendimit të dhënë nga drejtësia shqiptare ndaj tij, pas përfundimit të procedurave gjyqësore në vendin e origjinës.