Gazetari grek me origjinë shqiptare, Antilian Kotzai, është bërë objekt i një vale komentesh fyese dhe me përmbajtje raciste në rrjetet sociale, pasi publikoi një opinion ku ngrinte shqetësimin për rikthimin e retorikës së ekstremit të djathtë dhe të ideologjisë së Agimit të Artë në Greqi.

Reagimet nisën pas publikimit në gazetën greke “Documento” të shkrimit të tij me titull “Kujdes, ideologjia e Agimit të Artë është këtu”.

Në artikull, Kotzai ndalej te debati i zhvilluar ditët e fundit në Athinë dhe te thirrjet e personave të lidhur me qarqe të ekstremit të djathtë për “çlirimin” e zonës së Agios Panteleimonas dhe të kryeqytetit grek nga personat që ata i përshkruajnë si “pushtues”.

Sipas gazetarit, një gjuhë e tillë risjell në kujtesë periudhën kur në Athinë regjistroheshin sulme dhe episode dhune ndaj emigrantëve, në vitet kur Agimi i Artë kishte një prani të fortë politike dhe në rrugë.

Pasi artikulli u shpërnda edhe në Facebook, Kotzai thotë se faqja e tij u mbush me qindra komente raciste dhe fyese. Sipas tij, mes tyre kishte si profile të identifikueshme, ashtu edhe llogari që i krijuan përshtypjen e një reagimi të organizuar kundër tij.

Mes mesazheve që ai thotë se mori publikisht ishin fraza si “Kthehu në Shqipëri nëse nuk të pëlqen” dhe “Je mysafir në këtë vend, ndaj nuk duhet të flasësh”.

Gazetari deklaroi gjithashtu se disa prej reagimeve përmbanin kërcënime për veprime ligjore kundër tij, për shkak të qëndrimit të shprehur në artikull se sulmet e organizuara ndaj emigrantëve dhe retorika që i nxit ato nuk mund të konsiderohen pjesë e një debati normal demokratik.

Kotzai, i cili është shtetas grek dhe prej vitesh është aktiv në çështjet që lidhen me integrimin dhe të drejtat e qytetarëve me prejardhje emigrante, reagoi duke bërë të qartë se nuk ka ndërmend të tërhiqet nga qëndrimet e tij.

“U pëlqen apo jo fashistëve, unë, ashtu si qindra mijëra fëmijë emigrantësh, jemi qytetarë grekë”, shkroi ai.

Sipas gazetarit, fakti që një person ka origjinë nga një vend tjetër nuk ia kufizon të drejtën për të marrë pjesë në debatin publik. Ai theksoi se është pjesë e detyrës së gazetarëve të komentojnë dhe të denoncojnë fenomene shoqërore që, sipas tyre, mund të cenojnë demokracinë dhe bashkëjetesën paqësore.

Pas sulmeve në rrjetet sociale pati edhe reagime solidariteti. Gazetarë dhe politikanë të spektrit të majtë e cilësuan atë që ndodhi si një “sulm të organizuar racist”, duke argumentuar se Kotzai u vu në shënjestër pikërisht sepse foli publikisht kundër racizmit dhe ideologjisë së Agimit të Artë.

Sipas tyre, vetë fakti që disa komentues i kërkuan një shtetasi grek të “kthehej në Shqipëri” për shkak të prejardhjes së tij, përforcon shqetësimin që gazetari kishte ngritur në artikullin fillestar.

Ngjarja ka hapur një debat më të gjerë në një moment kur në Greqi po diskutohet sërish për aktivitetin dhe ndikimin e grupeve të ekstremit të djathtë.

Në shkrimin e tij, Kotzai i referohet edhe Ilias Kasidiaris, ish-figurë drejtuese e Agimit të Artë, i shpallur fajtor në vitin 2020 në çështjen gjyqësore ku organizata u trajtua si organizatë kriminale.

Kotzai përmend deklaratat e Kasidiaris se synon të gjejë një mënyrë për të qenë politikisht “i pranishëm” në zgjedhjet e ardhshme, duke e përdorur këtë si një tjetër argument se fenomeni i ekstremit të djathtë nuk duhet konsideruar i mbyllur.

Për gazetarin, edhe pas valës së reagimeve që pasoi publikimin e artikullit, përfundimi mbetet i njëjtë me mesazhin që kishte dhënë që në titull:

“Ideologjia e Agimit të Artë është këtu dhe kërkon vigjilencë demokratike.”